உங்கள் அருகில் எனக்கும் இடம் தாருங்கள்! சண்டை பிடிக்கும் அமைச்சர் நான்

முருங்கன் ஆதார வைத்தியசாலையில் நோயாளர்களின் வருகை அதிகமாக காணப்படும் நிலையில் இரண்டு வைத்தியர்கள் மாத்திரமே ஓய்வில்லாமல் கடமையாற்றி வருவதாக தெரிவிக்கப்பட்டுள்ளது.

முருங்கன் ஆதார வைத்தியசாலைக்கு வட மாகாண சுகாதார அமைச்சர் ஜீ.குணசீலன் நேற்றைய தினம் திடீர் விஜயமொன்றை மேற்கொண்டுள்ளார்.

இதன்போது அவர் முருங்கன் ஆதார வைத்தியசாலையின் அபிவிருத்தி குழு உறுப்பினர்களுடன் கலந்துரையாடல் மேற்கொண்டுள்ளார்.

இந்த நிலையிலேயே குறித்த விடயம் தொடர்பில் அபிவிருத்தி குழு உறுப்பினர்களால், வட மாகாண சுகாதார அமைச்சரிடம் சுட்டிக்காட்டப்பட்டுள்ளது. இதன்போது அபிவிருத்தி குழு உறுப்பினர்கள் மேலும் தெரிவிக்கையில்,

சாதாரணமான நோய்களுக்கு மருந்து பெற கூட நோயாளிகள் நாள் முழுவதும் காத்திருக்க வேண்டிய நிலை ஏற்பட்டுள்ளது.

இந்த நிலை மாற்றம் பெற எமது முருங்கன் வைத்தியசாலைக்கு மேலதிகமாக நான்கு வைத்தியர்களாவது தேவைப்படுகிறார்கள்.

அத்துடன் மகப்பேற்று குளிரூட்டிகள் இல்லை. இதேவேளை மின்சார வசதிகள், பிறந்த குழந்தைக்கு இளம் வெப்பம் தரும் வோமர் இப்படியான அடிப்படை வசதிகளும் இல்லை.

சில இடங்களில் பிரதேச வைத்தியசாலைகளில் தேவைக்கு அதிகமாகவே வைத்தியர்கள் உள்ளார்கள். உதாரணமாக யாழ்ப்பாணம், தெல்லிப்பளை, பருத்தித்துறை ஆதார வைத்தியசாலைகளில் 30 இற்கும் மேற்பட்ட வைத்தியர்கள் உள்ளதாக அறிய முடிகிறது.

தாதியர்கள் பற்றாக்குறை உட்பட அனைத்து வசதிகளையும் எமது வைத்தியசாலைக்கு செய்து தாருங்கள். அல்லது நாம் வீதிமறியல் போராட்டத்தில் ஈடுபடுவதை தவிர வேறு வழியில்லை என சுட்டிக்காட்டியுள்ளனர்.

இதனையடுத்து வட மாகாண சுகாதார அமைச்சர் ஜீ.குணசீலன் கூறுகையில

போராட்டத்தின் மூலமே மக்கள் தங்கள் உரிமைகளை பெற்றுக்கொள்ள முடியும். அப்படி போராடும் பொழுது உங்கள் அருகில் எனக்கும் ஒரு இடம் தாருங்கள்.

மக்களுக்காக வீதியில் இறங்கி போராடியாவது அவர்களின் உரிமைகளை பெற்று கொடுக்க முடியும் என்று நம்புகிறேன். வால் பிடிப்பவர்கள் மத்தியில் மக்களுக்காக சண்டை பிடிக்கும் அமைச்சர் நான்.

முருங்கன் ஆதார வைத்தியசாலைக்கு இரண்டு மாதத்திற்குள் இரண்டு வைத்தியர்களை பெற்றுக் கொடுப்பது என் நோக்கம். இது பற்றி உரிய தரப்புடன் பேசப்பட்டுள்ளத

மாதமளவில் 250 வைத்தியர்களின் விண்ணப்பத்தில் 40 வைத்தியர்கள் வட மாகாணத்திற்கும் ஆறு அல்லது ஏழு பேர் மன்னார் மாவட்டத்திற்கும் தரப்படும். அதில் முருங்கனுக்கு என இரண்டு வைத்தியர்கள் நியமிக்கப்படுவார்கள்.

அத்துடன் தற்பொழுது பணிபுரியும் வைத்தியர்களுக்கான இடமாற்றம் வரும் பொழுது அந்த இடத்திற்கான வைத்தியரை பெற்றவுடன் இடமாற்றத்திற்கு அனுமதிக்க வேண்டும்.

நான் மாகாணம் மற்றும் மத்தியில் கேட்டது போல் வைத்தியர்கள் கிடைக்காத பட்சத்தில் மக்களுடன் நானும் இணைந்து போராடுவேன் என குறிப்பிட்டுள்ளார்.